--------------------------------------------------------------------------------
قصة بريطانية..بترجمة بدوية....
كان فيه عجيز بريطانية واسمها أم جون تسكن في لندن وعندها قطيوه اسمها شقحاء
طبعاً هالقطيوه تسوى عيونها الثنتين المهم في يوم من الايام طول الله عمركم وترقى شقحاء
على الشجرة واظن الشجرة عوشزه المهم مالكم بالطويلة ويقدر الله عليها
وتنشب فوق الشجرة وتجي العجيز تبي تفزع ولا قدرت.. منا.. منا.. يابنت حاولي ..مااااااااش
الحالة مالها دواء ..وتقوم العجيز تبتسي وتقعد تشخر وتنخر وتقوم وتزعج العالم وتتصل
على الدفاع المدني وعلى الهلال الاحمر وتقعد تدقدق على المطافي تبي احد يفزع لشقحا اللي
متعلقة فوق الشجرة المهم يالوجيه الغانمة مادرت الا هالدفاع المدني يركضون يمشون مليون
وتقوم العجيز تأشرلهم بشيلتها عشان يدلون البيت والله ويجون اللحى الغانمة واولهم محماس
بن سميث ويجي عند الشجرة ويقعد ينطنط يبي يشوف شقحاء ويجونك شليويح بن سبنسر
وصنهات بن جورج ويجيبون معهم السلم ويحطونه على الشجرة ويجيك المهايطي محماس
ويسمي بسم الله ويطمر على السلم وييختل شقحاء من وراها ويلقطها لقطة الصقر للارينب
المهم وينزلها وتقوم العجيز وتطمر تحب خشمه من الوناسة قالت بعدي ياسنايدي
انا اشهد مايجيبها الارجالها بيض الله وجهك يابوسميث المهم وتنشب فيهم العجيز والله ان تقلطون
وتاخذون كرامتكم قالوا لها كثر الله خيرتس يام جون وحنا والله عجلين ورانا شغيلاتن بنقضيها
قالت والله ماتعدون الا انتم ماخذين فنجال والله ويقلطون الريجيل وياخذون على فنيجيل المهم
يوم عينو من الله خير كرموا وطلعوا وسلمو على ام جون ويركبون موترهم وينقز
شليويح سواقهم ويجيك محماس على الباب الايمن ويطمرصنهات في ظهر الموتر..ويقوم
محماس يشر للعجوز نافخن صدره ويدق سلف شليويح ويحرك الموتر ويدعس وفي دعسته
دعس القطيوه الي فزعولها اثرها نايمة تحت الكفر.
.قامت العجيز عاد تردد البيت اللي يقول:
"ياليتنا من حجنا سالمين"
ايش رايكم بالقصة؟؟؟
